Álemde óz elinen tynyshtyq tappaǵan mıllıondaǵan adam ózge memleketterdi panalaýǵa májbúr. Dúnıejúzilik banktiń málimetinshe, 2050 jyly olardyń qataryna taǵy 216 mıllıon adam qosylýy múmkin. Biraq oǵan sebep – qarýly qaqtyǵystar emes. Bul adamdar klımattyń ózgerýi saldarynan bosqynǵa aınalatyn túri bar. Olar orman órti, sý tasqyny, daýyl men qýańshylyq kesirinen týǵan jerin tastap, ómir súrýge qolaıly orta izdeýge májbúr. Mamandar búginniń ózinde jer betindegi ortasha temperatýra ındýstrııaǵa deıingi kezeńmen salystyrǵanda, 1,2 gradýsqa joǵary ekenin aıtady. Sonyń saldarynan ásirese Afrıka elderinde «klımattyq bosqyndar» kóbeıýi múmkin. Sondaı-aq Azııada, Latyn Amerıkasy men Shyǵys Eýropada da tabıǵat apattarynan qonys aýdarýǵa májbúr bolǵandar qatary artýy yqtımal.
AQSh-ta mundaı jaǵdaı qazirdiń ózinde baıqalyp otyr. Máselen, amerıkalyqtardyń 79 paıyzy tabıǵı apattar jıi bolyp turatyn aýdannan úı almaıtyndaryn aıtady.
«Byltyrǵy statıstıkany keltireıin. О́tken jyly tabıǵat apattary saldarynan 31 mıllıon adam qonys aýdarǵan. Jyl saıyn kórsetkishter tek artyp barady. Sóıtip klımattyq bosqyndardyń qarýly qaqtyǵystan qashqan azamatardan asyp ketetin túri bar. Tabıǵat apattarynan ashqursaq júrgender qatary da artyp barady. Koronavırýsqa deıin ondaı 26 mıllıon adam bolǵan. Qazir bul kórsetkish odan da kóp. Sarapshylar aýaǵa bólinetin zııandy zattardyń mólsherin azaıtý kerektigin aıtady. Negizi koronavırýs pandemııasy kezinde álemde ekologııalyq ahýal birshama jaqsaryp qaldy degen aqparat paıda bolǵan edi. Alaıda BUU-nyń sońǵy baıandamasyna sáıkes, karantın sharalary ýaqytsha áser bergen eken. Sóıtip kómirshqyshqyl gazynyń mólsheri qaıtadan burynǵy kórsetkishterge jetip qalypty. Atmsoferadaǵy parnıktik gazdardyń mólsheri áli de rekordtyq deńgeıde», deıdi BUU Bas hatshysynyń apat qaýpin azaıtý jónindegi arnaıy ókili Mamı Mızýtorı.
